Kidendak 20 urte betetzen ditu

Badirudi Kidenda atzo hasi zela bere jardueran, baina 20 urte bete ditugu dagoeneko. Egia esan, Kidendak lehenago ekin zion jarduera horri, 1996an hain zuzen, Bilboko Elizbarrutiko Caritasen eta Bizkaiko Elizbarrutiko Misioen konpromiso gisa, bidezko merkataritza baliatuz Hegoaldeko herrialdeen garapena sustatzeko gogoz.

90eko hamarkadaren amaieran sortu zenez geroztik, Kidenda haziz doa eten gabe, adore handia jarriz Bizkaian bakarra den ekimen baten garapenean, eta pixkanaka ari da egituratzen, eta berari lotzen zaizkio kristau komunitateetako hainbat lagun.

Taldeen eskaria gero eta handiagoa zenez lurralde osoan, 2002an Kidenda Elkartea sortu zen, eta denda bat ireki, proiektuaren egoitza izateko xedez. Hori erabakigarria izan zen, lehen urteetako joan-etorriak alde batera uzteko eta erreferentziazko espazio egonkor bat eskaintzeko aukera eman baitu boluntarioentzat zein bezeroentzat.

XXI. mende berriaren lehen hamarkadan proiektua dimentsio guztietan hazi zen; lurralde osoko taldeak hazi eta egituratu ziren bidezko merkataritzaren aldeko konpromisoan, langileak kontratatu ziren lurralde-egitura koordinatua sortzeko, sareetan parte hartzen hasi ginen, besteak beste, Caritasen Elizbarrutiarteko Sarean (2000), Alboan bazkide berria sartu zen (2006), eta bigarren denda bat ireki genuen.

Bigarren hamarkadan nolabaiteko ezegonkortasuna bizi izan da urte batzuetan, langileen txandakatzearen eta krisi ekonomikoaren ondorioz. Ondorio horietako bat izan da bigarren denda 2014an itxi izana. 2014. urteaz geroztik beste etapa bat hasi zen, eta bertan sartu   Kidenda Koopera taldean. Parte hartzeari eta eginkizun eraginkorrago bat edukitzeari ekin genion Ekonomia Alternatibo eta Solidarioko Sarean, proiektua jakinaraziz. Geure burua hobeto ezagutarazteari ekin genion sare sozialen bidez. Boluntariotza ahuldu egiten da aldaketen harira, eta jarduerari eutsi arren, boluntarioen kopurua murrizten hasi da kristau komunitateetan.

Eta hamarkada honen hasieran, COVID-19aren pandemiak berritzera eta berrasmatzera behartzen gaitu, gure zerbitzu batzuk digitalizatuz, hala nola prestakuntza, sentsibilizazioa, online dendaren bidez saltzea, komunikazioa boluntarioekin... Hamarkada berri honetan ere betaurreko moreak jantzi ditugu, eta genero-berdintasunaren aldeko antolaketa-prozesu bati ekin diogu, Kidenda erakunde bizigarri, bidezko eta zuzenagoa izan zedin emakume eta gizonentzat.

Hori guztia aipamen bat baino ez da, egindako bidea oso azaletik laburbiltzen duena. Urte honetan zehar zehatzago gogoratu eta deskubrituko dugu duela 20 urte baino gehiago hasitako bidea. Horretarako, zure argazkiak, testigantza eta materialak behar ditugu, Kidendaren hasiera eta garapena kontatzen dituztenak.